Um síðustu helgi fórum við Daði og Hanna Sigga í smá túristarúnt um Suðurland. Við skoðuðum Gullfoss og Geysissvæðið sem og Ljósafossvirkjun. Þetta var hinn skemmtilegasti rúntur og það kom mér svakalega á óvart hversu mikið er af erlendum ferðamönnum á þessum svæðum núna í febrúar. Hanna Sigga ætlaði sko ekki að koma með okkur á hverasvæðið og sagðist bara ætla að bíða í bílnum á meðan við færum að skoða. Eftir mikið þref og loforð um nammi og kannski ís þá fékkst hún til þess að koma með okkur en bara ef ég passaði hana rosavel og héldi á henni allan tímann.Þegar hinsvegar á hólminn var komið var litla prinsessan alveg hugfangin af Strokki og gosunum og vildi horfa aftur og aftur.
    Gullfoss var auðvitað líka fallegur og þar sem ekki er mikið um snjó og hálku þessa dagana þá gátum við labbað stíginn alveg niður að fossinum.  Hönnu Siggu fannst hann líka voða flottur en þegar hún fór að gera sig líklega til þess að henda grjóti ofan af bergbrúninni var okkur Daða nóg um og haldið var heim á leið.
Bið að heilsa ykkur öllum
Dísa


Pabbinn að stríða stelpunni á meðan mamman reynir að stilla henni upp

Hanna Sigga og Daði við Ljósafossvirkjun

Sæta prinsessan mín

Prinsessan við Gullfoss

Gleðilegt nýtt ár elsku fólk.
Héðan er allt fínt að frétta og við fjölskyldan að berjast við að snúa sólarhringnum við eftir jólafríið og koma daglega lífinu á rétt ról.
       Við vorum yfir aðal jóladagana á Hornafirði þar sem við höfðum það mjög gott með öllum okkar nánustu þeim megin í fjölskyldunni. Bræður mínir Jónsi og Hrafn komu líka frá Reykjavík ásamt Snæju stuðbolta þannig að við vorum öll systkinin á Höfn um jólin. Mér finnst ég svei mér þá alltaf vera að fatta það betur og betur hvað það er ómetanlegt að eiga svona mörg systkini. Fyrir það er ég gríðarlega þakklát og væri alveg til í að nenna að veita stelpnunum mínum það (sem ég er þó langt frá því að nenna).
     Milli jóla og nýárs komum við hingað til Rvíkur þar sem ég tók þátt í flugeldasölu fbsr. Salan gekk mjög vel og mér fannst alveg ótrúlega gaman að taka þátt í þessu. Ég var hrædd um að geta ekkert aðstoðað fólk því ég væri svo illa að mér í flugeldafræðum en þeir í sveitinni sáu um það og buðu okkur uppá tvær flugeldasýningar þar sem okkur voru sýndar allar aðal bomburnar. Ég gat því með góðri samvisku mælt með hinu og þessu þegar fólk kom og spurði.
      Á gamlársdagsmorgun flugum við svo á Akureyri þar sem við eyddum áramótunum með Eyjarfjarðarhluta fjölskyldunnar. Við keyptum alveg helling af flugeldum (ég mælti með nokkrum mjög góðum (: ) og sprengdum allt dótið heima hjá Svövu og fjölskyldu um kvöldið. Hanna Sigga var svakalega dugleg og hélt á blysum og stjörnuljósum og hafði voðalega gaman af öllu. Ég hafði keypt handa henni rosalega sætar bleikar heyrnahlífar sem gerðu algerlega gæfumuninn :)  Á laugardaginn fórum við öll á Grenivík og lékum okkur í snjónum hjá sumarbústað tengdaforeldra minna. Það var svo mikill snjór fyrir norðan að ég hef bara aldrei séð annað eins og var eins og lítill krakki að búa til snjóhús og hoppa í skafla. Við lékum okkur líka á snjósleðanum og svei mér ef hann Daði ætti ekki bara að kaupa sér eitt stykki svo gaman hafði hann af græjunni.
     Heyrðu já eitt enn sem ég verð bara að minnast á!!  Ég var að komast að því í gær að ég varð í 3ja sæti í Kettlebells jólaáskoruninni núna rétt fyrir jól!!!  Vann þvílíkt flott verðlaun, 2 bækur og einn geisladisk. :)  Mjög ánægð með mig.  Svona til gamans (og smá monts) þá ætla ég líka að segja frá því að það er búið að breyta heimasíðu kettlebells.is og þar er þessi líka glæsilega en reyndar pínulitla mynd af mér :)  mana ykkur til að reyna að finna mig  
       En já,,,, núna er rútínan að taka við og allt að fara af stað aftur. Birna byrjaði í skólanum í dag og ég byrjaði að vinna í gær.
Ég hlakka mikið til komandi árs og er bjartsýn á að þetta verði með betri árum ef ekki það besta :)Bið að heilsa ykkur öllum og óska ykkur líka besta árs allra tíma :)

Ooooo það var svo gaman hjá mér að leika í snjónum á Grenó

Spurning hvor skemmti sér betur, ég eða Hanna Sigga

Jól jól jól. Núna eru sem sagt alveg að koma jól og ýmislegt búið að gerast síðan ég skrifaði síðast fyrir mánuði síðan (hmmm).
       Í fyrsta lagi þá fór ég í hreint magnaða ferð með B1 í flubbunum í lok nóvember og við gengum á nokkur fjöll í botni Hvalfjarðar og gistum svo í tjaldi við Súlurætur. Við fengum frábært veður bæði um daginn og nóttina. Við stelpurnar vorum 4 saman í tjaldi (ég, Sigrún, Steinunn og Sigga) og það fór bara vel um okkar svona fyrir utan risagrjótið sem stakst upp í bakið á Sigrúnu og holu sem ég rann alltaf ofaní :-) Voða fyndið svona eftirá.
       Um síðustu helgi var svo "Jólahlaðborðshelgin mikla"!!! Þá fórum við Daði nefnilega á tvö jólahlaðborð, á föstudeginum með vinnunni hans Daða og á laugardeginum með vinnunni minni. Það sniðugasta við þetta allt saman var þó ekki að bæði boðin skildu hafa komið upp á sömu helginni heldur var aðal djókið það að bæði hlaðborðin voru á Lækjarbrekku!!!?!?!? Sem ég er ekki einusinni það hrifin af!! Þessi helgi var samt alveg hin allra skemmtilegasta og það var sko mikið borðað og drukkið í góðra vina hóp.
       Núna undanfarna viku er Daði búinn að vera í LA svo ég er búin að vera ein með stelpurnar að undirbúa jólin. Á svona stundum er sko gott að vera ofurkonan því ég er búin að þurfa að taka á honum stóra mínum til að koma öllu í verk. Ég er búin að taka til, hengja upp seríur, skreyta húsið, kaupa jólagjafir, skreyta jólatréð með stelpunum, búa til -skrifa á og senda jólakort, pakka inn öllum jólagjöfunum, baka og skreyta piparkökur með stelpunum ofan á allt hitt venjulega dótið eins og að vinna allan daginn og mæta í ræktina. Já og svo er ég meira að segja búin að selja nokkur jólatré með fbsr. Eins og ég segi,,,,,, mikið gott að vera ofurkona ;)
   Daði minn er svo að koma heim á morgun þannig að við náum örlítið að njóta jólaundirbúningsins saman. Ég er nefnilega ein af þeim sem finnst aðdragandi jólanna ef ekki bara skemmtilegri en jólin sjálf og finnst því alveg nauðsynlegt að jólaundirbúningurinn sé ekki bara stress.
Núna ætla ég svo að fara að koma mér í bælið svo maður verið nú reddý í vinnuna í fyrramálið.
Bið að heilsa ykkur öllum og gleðilegan jólaundirbúning :)

 

Birna Luna að skreyta jólatréð

Hanna Sigga líka að skreyta

Og svo nokkrar úr Hvalfjarðargöngunni góðu. Sigrún, Sigga og Steinunn eiturhressar í morgunsárið

Ég í fjandans holunni :)

Aumingja bakpokarnir okkar Siggu sem voru úti alla nóttina voru frosnir í gegn

Ég og Sigrún sætar að vanda

Ég og Glymur

Það má eiginlega segja að ég sé alger bloggletihaugur. Ég hef þó ágætis afsökun núna því ég hef haft helling að gera og er hálf rugluð í öllu sem á gengur þessa dagana og vikurnar. Ég auðvitað byrjaði í nýrri vinnu fyrir uþb 2 vikum og það tekur helling á. Ég er líka byrjuð í flubbastarfinu aftur og fór um síðustu helgi með B1 yfir Heiðina háu enn og aftur!! Þetta var alveg ágætis ferð þó svo veðrið hafi verið frekar glatað, þoka, rok og rigning. Mér líst bara mjög vel á hópinn í ár og er alveg viss um að nýliðastarfið á eftir að vera þrælskemmtilegt.
       Hvað vinnuna varðar þá er þetta allt að koma og ég vona að ég verði komin ágætlega inn í hlutina eftir svona mánuð. Nýtt forritunarmál og ný tól á nýjum vinnustað þannig að þetta tekur sinn tíma.
       Daði hefur verið að vinna svo mikið undanfarið að ég hef sama og ekkert séð hann. Hann kemur heim eftir að við erum sofnaðar og svo fer ég út áður en hann fer á fætur daginn eftir. Voðalega fjölskylduvænt eða þannig!!
Setti inn nokkrar myndir úr ferðinni
Bið að heilsa öllum
Dísa

Svona var nú veðrið alla helgina :(

Smá pása

Sigrún og Steinunn mjög menntaðar í útivistinni og fá sér heitt te í einu stoppinu

Sigrún, Steinunn og ég uppi á einhverju "fjalli" (man ekkert hvað það heitir)

       Alveg kominn tími á smá fréttir af okkur hérna á Nýlendugötunni. Ég er sem sagt byrjuð að vinna hjá Betware og alveg á fullu í að reyna að komast inn í hlutina þar. Ég er að vinna með fullt af skemmtilegu og kláru fólki og mér sýnist ekkert því til fyrirstöðu að þetta verði mjög góður vinnustaður. Nú er svo bara að koma sér aftur í multitask-gírinn, þ.e vinna, sjá um heimilið og mæta í ræktina. Já og svo má ekki gleyma Flubbunum, en ég ætla að gera aðra tilraun til þess að ganga í flugbjörgunarsveitina og bara að vona að það verði ekki önnur katastrofía hérna á landinu í vetur sem setur allt á hvolf hjá manni :)
       Birna Luna er lika byrjuð í skólanum aftur og er mjög kát og ánægð. Við erum búin að skrá hana í dansskóla þannig að þetta verður örugglega skemmtileg önn hjá henni líka.

Í augnablikinu man ég ekki eftir neinu öðru að segja frá og ætla því að hætta núna.
Bið að heilsa ykkur öllum
Disa

Mamma mín hélt upp á 60ára afmælið sitt fyrir nokkrum dögum síðan og í tilefni af því þá var haldin veisla í félagsheimilinu á Kirkjubæjarklaustri. Fullt af ættingjum mínum og vinum mömmu mættu í veisluna sem tókst með eindæmum vel. Maturinn var allur heimagerður og alveg með ólíkindum flottur og vel útfærður og allir átu á sig gat og drukku með því það sem hver vildi. Nokkrar myndir voru teknar í veislunni og ætla ég að setja þær hérna inn til gamans.
Ég ætla að hætta núna en lofa að skrifa meira seinna.
Kær kveðja til ykkar allra og verum góð við hvort annað

Við öll fjölskyldan, svo fín

Við hjónin

Við systkinin, glæsileg að vanda

Ég og litlu bræður mínir

Hrund hans Jónsa og Daði minn svo sæt og fín þessar elskur

Mamma með alla ungana sína

Við Daði aftur voðalega sæt og happý

Ég er að reyna að gera það upp við mig hvort ég eigi að halda áfram með þessa síðu. Var búin að ákveða að hætta alveg með hana en held svei mér þá að ég sé hætt við það að hætta,,,, æ það kemur í ljós hvað maður gerir.
       En núna er verslunarmannahelgin rétt að byrja og planið hjá okkur er að fara út á Foss með mömmu & pabba, Evu og Frissa og Steina og Guggu (og auðvitað öllum börnunum). Sumarið hjá okkur hefur verið voðalega næs. Við byrjuðum á því að fara til Spánar og höfðum það alveg æðislegt í tvær vikur. Ég sá það hvað ég hafði saknað Spánar mikið og það var gott að koma "heim" í íbúðina góðu. Daði komst ekki með til Spánar út af vinnunni og á meðan við vorum úti þá flaug hann til Californiu og var þar í tvær vikur.
       Eftir að við komum heim frá Spáni fengum við mæðgur smá útileguæði og fórum ferðuðumst landshornanna á milli með tjaldið okkar. Fyrst ferðuðumst við um Austfirðina, í næstu ferð um Vatsnes, Skaga og Tröllaskaga og í síðustu ferðinni um Vestfirði. Ég held ég verði að fá að segja frá þessm ferðum við betra tækifæri en núna læt ég mér nægja að segja að þetta voru yndisleg ferðalög um yndislegt land og ég væri til í að fara af stað aftur strax á morgun. Þetta land okkar er algerlega ótæmandi uppspretta fallegra staða og skemmtilegs fólks.
       Enn eitt að frétta er að ég er komin með vinnu!! Ég fékk vinnu hjá Betware sem er eitt myndalegasta hugbúnaðarfyrirtæki landsins og ég get varla beðið eftir því að byrja. Ég þekki fullt af fólki sem er að vinna hjá Betware þannig að ég býst bara við þvi að þetta verði frábær vinnustaður :)
       Já og ennþá eitt sem ég held ég verði bara að segja frá hérna (Daði verður örugglega fúll út í mig fyrir montið) er að hann Daði minn fékk stöðuhækkun um daginn og er núna orðinn aðal maðurinn á sínum vinnustað. Honum gengur sem sagt svakalega vel og öll vinnan sem hann hefur lagt á sig að undanförnu er að skila árangri.

Núna er best að fara að pakka niður fyrir helgina svo maður komist einhverntíma í af stað.
Bið mjög við að heilsa ykkur öllum og eigið góða helgi hvar sem þið eruð niðurkomin.
Setti inn nokkrar myndir frá Spáni bara svona uppá grínuð

Hanna Sigga og Emma í risaholunni sem Hrafn gróf fyrir þær.

Axel og Hanna Sigga á ströndinni

Öll litlu börnin að hjálpa Birnu Lunu í tölvuspilinu

Við mæðgur og miðjarðarhafið

Hrafn bró með Hönnu Siggu sína í sundlauginni

Eva og börnin að labba heim af ströndinni

Ein sveitt í 30 stiga hita

Í dýragarðinum. Afi að hjálpa Hönnu Siggu að gefa gíraffanum hnetur

Svakalega svöng cameldýr að sníkja hentur

Ég og mamma gersamlega bakaðar

Páskafríið búið og hversdagsleikinn tekinn við á ný. Við Daði og Hanna Sigga drifum okkur norður á Akureyri yfir páskana en Birna Luna vill aldrei fara neitt nema á Höfn þannig að hún er búin að vera þar i rúma viku núna.
     Við vorum í hópi þeirra mörg þúsund Reykvíkinga sem fóru norður um páskana og fylltu bæinn gersamlega. Ég er að segja ykkur að það var svo mikið af fólki að það var alger snilld. Fjallið var stútfullt alla dagana enda roknafæri allan tímann.
Akureyringar voru búnir að búa sig undir alla sunnlendingana og ekki hægt að segja annað en að öll þjónusta í bænum hafi verið til fyrirmyndar, sundlaugar, verslanir og veitingastaðir opnir og allskonar uppákomur í bænum og Fjallinu.
       Við notuðum tímann vel og fórum tvisvar á Grenivík, þar sem rætur fjölskyldu Daða liggja, og hittum þar fullt af góðu fólki. Við renndum okkur um allt Grenivíkurfjall á snjósleðum og snjóðþotum og nutum þessa fallega staðar sem Grenivík er.
Við Daði skelltum okkur líka á skíði og þrátt fyrir mikið af fólki náðum við að renna okkur alveg fullt.
     Þessi páskahelgi var s.s alveg frábær og ekki laust við að mann langaði ekkert aftur heim til Reykjavíkur á mánudaginn!! Núna erum við hinsvegar komin heim og Birna Luna komin frá Höfn og allt farið að ganga sinn vanagang.

Bið að heilsa í bili og hafði það nú gott.
Dísa
 
 
 
Gaman á snjósleðanum á Grenivík
 
Daði og Jón Eiður bróðir hans á sleðanum og ég að græja mig fyrir rosalegan sleðarúnt sýnist mér :)
 
Hanna Sigga og mamman að leika sér í snjónum

Hanna Sigga og Andri frændi hennar i sumarbústaðnum þeirra Svövu og Gests